Partia Demokratike ka reaguar pas denoncimeve me fakte të kontrabandës sistematike që lejohet nga Drejtoria e Përgjithshme e Doganave, e drejtuar nga Gent Gazheli.
Pas bërjes publike nga News 24, të një email-i të një zyrtari të Doganave që denoncon eprorët të cilët nuk lejojnë kontrollin e një kamioni me mallra kontrabandë, PD “i ka kërkuar Gent Gazhelit të “hapë krahun”.
Në një deklaratë për mediat, anëtari i Këshillit Kombëtar të PD Çlirim Gjata u shpreh se “si mëkëmbës i Edi Ramës në dogana, Gent i ka krahët e ngrohta sot”, por e siguroi se “forca e ligjit do të veprojë në mos sot, mot”.
“Partia Demokratike i kërkon mbretit Gent të vjedhjes në dogana “të hapë krahun”. Çdo ditë e tij me butonin e traut në dorë është një vjedhje më shumë në arkën e përbashkët publike, një dorë më shumë në xhepin e çdo qytetari. Si mëkëmbës i Edi Ramës në dogana, ai i ka krahët e ngrohta sot, por ne e sigurojmë se forca e ligjit do të veprojë. Në mos sot, mot!”, thotë Gjata.
Njoftimi i plotë:
Raportimet mediatike nxjerrin çdo ditë një provë të re për përfshirjen në vjedhje të kryedoganierit Gent Gazheli.
Fakti më i fundit është një e-mail i drejtorit të Antikontrabandës detare i cili i kërkon Gazhelit kontrollin e një kamioni me mallra kontrabandë.
Sipas e-mailit që po e tregojmë këtu, drejtori i Antikontrabandës detare flet për shkelje të përsëritura nga i njëjti kundërvajtës, me bekimin e shefave në doganë.
“Eprorët bëjnë çmos që ky mjeti i dyshuar si transportues mallrash kontrabandë të mos kontrollohet’, thuhet në e-mail.
Partia Demokratike denoncon këtë vjedhje të dyfishtë.
Së pari, është zhvatja e shtetit, duke kaluar mallra pa tarifa doganore ose me tarifa të reduktuara.
Së dyti, është vjedhja e drejtpërdrejtë e konsumatorit.
Sipas komunikimit, bëhet me dije se mallrat e pazhdoganuara janë produkte të falsifikuara të firmave të shtrenjta të modës, të cilat shiten në butikët e shtrenjtë të Tiranës si origjinale.
Për të sfiduar drejtorin e Përgjithshëm të Doganave në këtë rast korruptiv, zyrtari i Antikontrabandës detare i drejtohet me fjalët ‘hape kamionin!’
Partia Demokratike i kërkon mbretit Gent të vjedhjes në dogana “të hapë krahun”.
Çdo ditë e tij me butonin e traut në dorë është një vjedhje më shumë në arkën e përbashkët publike, një dorë më shumë në xhepin e çdo qytetari.
Si mëkëmbës i Edi Ramës në dogana, ai i ka krahët e ngrohta sot, por ne e sigurojmë se forca e ligjit do të veprojë.
Në mos sot, mot!
